دليل المبتدئين فى عمل الليكويد DIY

واحدة من اهم عيوب الفيب ، هي تكلفة الليكويد .. لو كنت بتشتري ليكويد و على الاقل بتشرب تانكين فى اليوم يعنى هتحتاج 10 مللي تقريبا فى اليوم ، ولو كنت من محبي الليكويد الجاهز او البريميوم يبقى هيتخرب بيتك.

ما تقلقش .. حل الموضوع ده إنك تعمل الليكويد بنفسك ، و دي هواية انتشرت بسرعة فى العالم كله .. لأنها فعلا سهلة و كمان موفرة جدا .. ده غير انك حقيقي هتبقى فى قمة سعادتك لما تشرب حاجة انت اللى طابخها و تعجبك و تعجب صحابك .

ابسط الأمور هي انك بتخلط اربع عناصر مكونة و رئيسية في الليكويد و دى عبارة عن جلسرين نباتى VG و بروبلين جليكول PG  ونيكوتين و فليفور ومش شرط تحتاجهم كلهم .. ماهو ممكن مثلا تحتاج تعمل ليكويد زيرو نيكوتين و بالتالي مش هتحتاج نيكوتين فى الخلط والموضوع سهل جدا مش معقد ولا محتاج كيميائي يعنى ولا معمل .. لو حضرتك بتعرف تسلق بيض .. يبقى اكيد هتقدر تعمل الليكويد :D

إيه بقى اللى هتحتاجه عشان تعمل الليكويد ؟

- البروبيلين غليكول - والمعروف باسم PG.. وتأكد انها USP يعنى معدة طبقا لشروط منظمة العقاقير الامريكية .

- الجليسرين النباتي - أو VG  ودي الجزء الأكبر فى الليكويد واللى برضه لازم تتأكد انها USP .

- النيكوتين -  وده اللى هتحتاجه عشان يعمل نفس التأثير على دماغك من السيجارة والشيشة. وده بقى هتبقى مضطر تجربه بنفسك وتقيس تأثيره عليك لما تشتريه من اى تاجر وعندنا فى مصر بيتباع فى كميات صغيرة 30 مل جرب فيهم براحتك .. احسن من دول تانية كتير عشان تجرب بتبقى مضطر تشتري 100 مل على اقل تقدير.

- النكهات المركزة أو الفليفورات -  ودي اللى بتدي الطعم اللى في الليكويد .. ودي بتكون حسب ميولك انت وانت اللى بتختارها حسب الريسبي ( الخلطة) اللى ناوي تطبخها. وممكن تشتريها كنكهة فردية ( سينجل فليفور ) او ممكن تشتري خلطات جاهزة لمجموعة نكهات مع بعض ( فليفور شوتس ) .

خلاف كدة .. هتحتاج بعض الادوات التانية عشان تخلط فيها المكونات اللى فاتت مثلا هتحتاج :

- أزايز التخزين -  ودي بتفضل تكون ازايز  من نوع PET  احجام 100 مل ولو قدرت تجيبها ازاز .. يبقى احسن بكتير .. التعتيق فى الازاز بيكون افضل من ازايز الPET .

- سرنجات – هتحتاج شوية سرنجات من الصيدلية كدة .. مقاس 50 مل هتجيب منها واحدة .. و مقاس 10 مل هتجيب منها حوالي 5 مثلا ومقاس 3 مل هتجيب منها واحد للنيكوتين .

- قطارات للتعبئة و تخص الاستخدام :  حاول كدة تشترى 10 قطارات كفاية فى الاول عشان تقدر تعبي فيهم ليكويد و تستخدمه بعد التعتيق والخلط .

- هتحتاج كمان اجندة و قلم و تسجل خطواتك اللى هتعملها واحدة واحدة .. عشان لو حبيت رجعلها وتعملها تانى .. او لو حبيت تعدل حاجة عليها ..

نمشي بقى خطوة خطوة:

الخطوة الأولي : هتحتاج لوصفة ونسب :

يعنى مثلا لو عاجبك ليكويد معين وليكن Mustard Milk يبقى حضرتك هتجيب الوصفة بتاعتها ازاى يتعملو  بيتكون من ايه مثلا هتلاقيها كالتالي :-

·         Strawberry (TPA) 6%

·         Vanilla Bean Ice Cream (TPA) 6%

 حضرتك بتلاقي ديما السطر في الوصفة عبارة عن 3 حاجات جنب بعض .. الاول اسم النكهة ( فراولة مثلا في السطر الاول ) جنبها كلمة TPA وده اختصار اسم الشركة المصنعة    The Perfumer's Apprentice  وبعدين النسبة من الفليفور المئوية .. يعنى مكتوب 6% يبقى حضرتك هتاخد منها 6 مل عشان تعمل ليكويد 100 مل

الخطوة التانية : خد قرارك :

محتاجك تاخد القرار انك هتعمل الليكويد بنسبة كام VG  لكام PG اغلب التانكات الجديدة كنفس شيشة بتستخدم نسب عالية من الجلسرين VG عشان يبقى الليكويد تقيل شوية و ما يعملش تسريب او Leak من التانك ولو عاوز تحس بثروت هيت جامدة فى الزور ( حرقة بسيطة يعنى زى السيجارة)   ممكن تزود نسبة الPG شوية و تخليها 60 جلسرين و 40 بروبلين.

الخطوة التالتة : حدد دماغك ؟؟

كل واحد مننا مختلف فى شربه للسجاير و على مدار كام سنة .. يبقى حضرتك اللى هتقرر هتحط كام نيكوتين يناسبك .. لكن لو محتاج النصيحة .. بما انك مبتدأ يبقى تعمل النيكوتين بتاعك تركيز 4.5 فى الاول .. وما رضتش اقولك 6 عشان في ناس هاجمتنى وقالت كتير :D :D :D  رغم انى واحد من الناس بدأت بنيكوتين 9 :D :D :D :D

الخطوة الرابعة : القياس :

محتاج تعرب النسب المظبوطة للقياس لو حاسس انك هتتلغبط و مش عارف هتحط كام جلسرين و كام بروبلين والنيكوتين اهو انت اللى هتحدده و النسب بتاعة النكهات ( الفليفور) موجودة فى الريسبي.

فيه مواقع كتير و برامج على الموبايل تقدر تحللك الموضوع ده زي  e-liquid-recipes.com و EjuiceMeUpو Vapor Calc. لكن الفكرة باختصار بتعتمد على ان حضرتك تعرف قاعدة النيكوتين والفليفور و هيتم خصمها من البروبلين ولا الجلسرين.؟

ببساطة حاول فى الاول تستخدم نيكوتين يكون قاعدته PG و ديما النكهات بتكون على قاعدة بروبلين أو ماء .. فى كلا الحالتين نعتبرها على بروبلين .

بعد كدة بقى تبدأ على بركة الله تخلط الطبخة حسب المقادير المناسبة ليك .. وليكن هتعمل الليكويد بنسبة 70 جلسرين : 30 بروبلين :

يبقى هتحط 70 مل جلسرين وعليهم 4.5 نيكوتين و الفليفور اللى فى الوصفة اللى فاتت كانت 6 مل فراولة و6 مل فانيلا بين ايس كريم .. وتجمعهم و تطرحهم من ال100 يطلع الباقي البروبلين اللى هتحطه على الخلطة :D

نيجي بقى للخلط

اول حاجة توفر مكان نضيف و مناسب و صحي مافيش فيه حيوانات أليفة او اطفال .. اغسل ايديك يا باشا .. والبس جوانتى مطاط ( عشان هتستعمل نيكوتين و ده يعتبر سم )

تجيب بقى برطمان او بيكر ازاز .. وتحط جانبك السرنجات وازايز العناصر الاربعة ..

1-      تمسك السرنجة ال50 سم .. و تعاير بيها الجلسرين .. هتاخد ال50 كلهم اول مرة و تحطهم فى البيكر .. بعد كدة تاخد كمان 20 مل بالسرنجة و ارجع حطهم تانى فى البيكر.. و كدة تبقى حطيت 70 مل جلسرين.

2-      تمسك بقى السرنجة ال3 سم .. وتحط بيها 3 سم نيكوتين و تعيد تانى تاخد 1.5 سم نيكوتين فوق الجلسرين اللى فى البيكر.

3-      تمسك سرنجة 10 سم للنكهة الاولى ( الفراولة) وتعاير بيها 6 مل من الفراولة و تحطهم على الخليط فى البيكر و تركن السرنجة دى خلاص ما تستخدمهاش تانى لحد ما تغسلها.

4-      تمسك سرنجة تانية 10 سم للنكهة التانية ( فانيلا بين ايس كريم) وتاخد بيها برضه 6 سم و تحطهم على الخليط اللى فى البيكر و تركن السرنجة.

5-      تيجي هنا و تحسب بقى .. هو البيكر بقى فيه كام من ال100 مل ؟؟؟؟ نحسب 70 جلسرين + 4.5 نيكوتين+ 6 فراولة + 6 فانيلا بين ايس كريم = 86.5 مل .. فاضلهم كام عشان يبقوا 100 ..؟؟ فاضل 13.5 مل .. خدهم بسرنجة بقى من ازازة البروبلين و حطهم على الخليط. و بكدة معاك 100 مل من الكاسترد ميلك تتهني بيهم يا باشا . :D

طب بعد ما عملنا الخليط ده بقى .. كدة خلاص ولا هنعمل ايه تانى ؟؟؟

دي بقى مرحلة المزج .... لازم تمزج الخليط ده كويس جدا .. ممكن ناس تستخدم مضرب الكابتشينو او القهوة و تمزج بيهم الخليط ده .. او ممكن تقفل الازازة بغطاها و تفضل ترج فيها لحد ما تعكر ولونها يبقى ابيض زى اللبن .. او مائل للإصفرار شوية.

طب وبعد الرج والمزج ده ؟

بس خلاص .. اقفل ازازتك .. حطها فى مكان ضلمة وفي درجة حرارة الغرفة واقفل عليها فترة كدة من 3 اسابيع لشهر .. عشان المزيج ده يعشق فى بعضه و يتمزج النكهات فيه كويس مع بعضها. وافتكر ان كل اما نسبة الجلسرين زادت .. كل ما تاخد وقت اكتر فى التعتيق (الاستيب).

اكتب كل اللى انت عملته بالتاريخ فى الاجندة .. عشان تعرف عملته امتى و امتى هتفتح الازازة و تجربه.

حاول ديما .. تخلي بالك ان الحرارة واشعة الشمس المباشرة ممكن تبوظ الليكويد وتخليه ما ينفعش تشربه .. فلو قفلت عليها فى مرحلة التعتيق فى مكان ضلمة اتأكد انه حرارته كويسة مش مكان الحرارة فيه مرتفعة.

بعد شهر يا باشا .. طلع الازازة .. اعمل تست ب1 مل فى التانك .. واشرب وشوف الطعم .. ساعتها صور نفسك سيلفي عشان نشوف تعبيرات وشك .. مبسوط من الطعم .. والا قرفان منه .. وهابي فيب :D :D :D