عمل الليكويد بطريقة السينجل فليفور

كتير مننا ممكن يكون لسة فى أول مرحلة من الفيب ..ولسة فيه حاجات المستخدم الجديد فاكر انها طلاسم .. هنحاول النهاردة نتعلم بطريقة مبسطة ازاى تعمل السائل الالكتروني ( الليكويد) ، رغم إن الموضوع ده اتنشر اكتر من مرة من أعضاء موجودين هنا .. بس واجب التنويه مرة تانية وتالتة ورابعة.

نبدأ ونقول .. حضرتك عشان تعمل داي محتاج شوية حاجات .. إيه هى ؟؟

أدوات : هتحتاج سرنجة تغذية 50 سم – سرنجة سكر 1 سم – سرنجة بيبي أو أطفال 10 سم - بيكر 250 مللى – بيكر 500 مللى- ازايز 120 مل فارغة بغطائها لغرض الاستيب .

تجيب الأدوات منين ؟

السرنجات من الصيدلية و البيكرات من شارع القصر العيني او العباسية عند بتوع المستلزمات الطبية وهتلاقي البيكر 250 مل فى حدود 10 جنيه أما ال500 مل هيبقى فى حدود 25 جنيه ، ولو مش عايز وبعيد عليك ممكن تستخدم برطمانات ازاز كبيرة فى البيت .. بس تعقمها كويس و تتأكد انها مش كارفة اى ريحة ، والازايز ممكن تلاقي ناس بتبيعها هنا او ممكن تنزل شارع الجامع الأحمر وتشتري ازايز تمن 125 مل من النوع PET الشفاف بس المشكلة ان فى الشارع ده هتجيب الازايز جملة يعنى بالمية .. وال100 ازازة من انلوع ده بالغطاء الابيض هتبقي فى حدود 45 جنيه.

نيجي بقى للمكونات: 

هتحتاج تشتري 1 لتر جلسرين – 1 لتر بروبلين – 30 مل نيكوتين + الفليفور .

طبعا المكونات دى متوفرة هنا فى الجروب .. و اخواتنا فى اسكندرية ممكن تسأل في الجروب المخصص لأعضاء اسكندرية وتعرف اكتر اماكن تواجد المكونات دى.

طريقة التحضير بقى :

فيه هنا مدرستين :

1- المدرسة القديمة : ودي بتفضل تعتق الفليفور فى البيز سينجل .. يعنى تعمل ليكويد بطعم فليفور واحد بس فى ازايز مستقلة .. و تقوم بالخلط فى الاخر .

ودي تتم ازاى ؟؟؟؟

- بنعمل كمية بيز كبيرة مرة واحدة بنسبة 80 جلسرين : 17 بروبلين : 3 نيكوتين 

يعنى بالبلدى كدة ...

- هات 800 مل جلسرين و حط عليهم 170 مل بروبلين وتضيف عليهم ال30 مل نيكوتين وتضربهم كويس بمضرب القهوة او الكابتشينو أو مضرب البيض أو بطريقة الرج .. لحد ما اللون الشفاف يروح و يعكر ولونه يبقى ابيض وبعد كدة تسيبه فترة 5 ايام عشان يتجانس ويتعتق كويس ، وبكدة بقى معاك بيز لتر كامل تركيز 3 نيكوتين بنسبة 80 جلسرين : 20 بروبلين.

- وقف عليك بكلم اللتر بيز .. نحسبها .. لتر جلسرين ب50 جنيه + قول لتر كمان بروبلين 60 جنيه وعليهم 30 مل نيكوتين بـ 100 جنيه يعنى الحسبة كلها 210 جنيه وفايض منها كمان 200 مل جلسرين و 830 مل بروبلين دول مكسب فايض و المللى بيز وقف ب21 قرش.

- تعالى بقى للفليفور .. اعمل حسابك كل شهر انك توفر 150 جنيه تجيب بيهم فليفورات 3 فليفور .. او خمسة .. حسب العبوة اللى فى السوق وبسعر المللى اللى اصبح منتشر 3 جنيه للمللى.

- حضرتك هتجيب بقى 90 مللى من البيز اللى عملته و تحط عليه 10 مللى ثابت من اى فليفور سينجل وتحطه فى إزازة و ترجه كويس جدا و تسيبه يتعتق فترة بين اسبوعين ل3 اسابيع . وبكدة يبقى معاك 100 ملل ليكويد جاهز بس بطعم واحد وبتركيز 70 جلسرين 30 بروبلين بعد إضافة الفليفور ,, وتكرر العملية دى مع كل فليفور على حدة .. وكل شهر تجيب فليفورات جديدة و تكمل المجموعة بتاعتك ... بعد فترة بسيطة هتلاقي عندك كمية كبيرة من الفليفورات المختلفة .. تقدر تنفذ بيها اى ريسبي ( خلطة) من على الانتر نت أو من حد من اصحابك .. ودى تبقى ازاى ؟؟؟ بتقلب النسبة المئوية اللى فى الريسبي لمللى و تاخد من كل فليفور عملته بالمللى مش بالنسبة % .. تعالى ناخد مثال ....

- Mother's Unicorn Milk

دى الريسبي بتاعتها كالتالي مثلا

Bavarian Cream (TPA) 4%

Cheesecake (Graham Crust) (TPA) 5%

Strawberry (Ripe) (TPA) 10%

Sweet Cream (TPA) 4%

Vanilla Custard (TPA) 3%

- تنفذها ازاى .... هتقلب النسبة المئوية لملل يعنى هتاخد من الاولى 4 ملل و التانية 5 ملل و التالتة 10 ملل والرابعة 4 ملل و الاخيرة 3 ملل و حطهم فى ازازة تانية و رجهم كويس وسيبهم يرتاحو و تقدر تشرب منهم من تانى يوم .. وتجرب .. لو عجبتك .. ضاعف الكميات .. طلعت وحشة .. اهو ماخسرتش حاجة دول كلهم 26 ملل ليكويد من الريسبي دى . 

- وبكدة تقدر تجرب اى وقت و تعمل عدد كبير جدا من الخلطات والريسبيهات زى ما تحب .. ويبقى عندك امكانية تبدع انت و دماغك .. وتجرب كتير لحد ما توصل لحاجة حلوة .. 

- اه نسيت اقولك انك لازم يكون معاك اجندة و قلم .. و تسجل ديما الخلطة اللى انت بتجربها .. عشان لو طلعت حلوة تقدر تنفذها تانى و تالت .. لكن لو خلطت بإيدك من غير كتابة .. لو عجبتك حاجة مش هتعرف بعد كدة تنفذها لأنك هتبقى نسيت الكميات اللي حطيتها و من انهى فليفور .