الفرق بين الـ Contact Coil بين الـ Spaced Coil

 كتبه : Ahmed Ghozzy 
Contact Coil 

هو كويل بتكون لفاته متلاصقة تماما.. بنلفه بحيث تكون لفاته قريبة قدر الامكان وبعد مانركبه بنعمله دراي برن (باور من غير قطن) لحد ما يسخن وبعدين نضمه على بعضه بتويزيرز او ملقاط عشان تتلاصق لفاته تماما.

 Spaced Coil 

هو كويل بتكون لفاته متباعدة وبينها مسافات او فراغات.. سواء وسعت الفراغات او ضاقت (ودا بيعمل فرق) لكن اداء الكويل العام بيكون في نفس الخط.

جرى العرف عند ناس كتير (ودا مش صحيح) بتسمية الكونتاكت كويل بمايكرو كويل.. ودا من سوء التفاهمات اللي بتحصل كتير.. هنتكلم بعدين عن الماكرو والمايكرو والنانو كويل (ودا تحديدا وبعيدا عن شكل الكويل شئ بيحكمه قطر الكويل اللي اتلف عليه.. مش شكله).

نفهم اكـتر:

======

من خصائص اداء الكونتاكت كويل انه ذو كفائة حرارية عالية.. بيحتاج وقت قليل جدا عشان يسخن بالكامل ويحمر على وات اقل بكتير من اللي يحتاجه سبيسد كويل.. دا بالنسبة ليك كفبـير معناه ان النفس وكمية الدخان والفلافور اللي ممكن تحصل عليها ممكن تحصل عليها من سحبة قصيرة في الوقت لان الكويل سخن ووصل لقمة اداءه في وقت صغير.. دا بسبب ان اللفات المتلاصقة كل واحدة بتسخن بتساعد اللي جنبها تسخن اسرع وهكذا فالكويل كله بيسخن اسرع ويديك اداء شبه فوري واحيانا حضرتك ممكن تفرفر في ايده لو مش فاهم البيلد اللي انت عامله.

من البديهي والمتوقع ان الكونتاكت كويل يديك نفس سخن لانه كل ما طالت السحبة كل ما الكويل سخن اكتر واكتر.. من مميزاته المعروفة انه بيطلع كلاود كبيرة وكل ماصغرت مقاومته كل ما بقى بيسخن اسرع اكتر واكتر ويطلع نفس اسخن وكلاود اكبر.

بيفرق بأه من تانك للتاني اذا كنت هتحس بفلافور ولا لا في وسط الزحمة دي لان الكويلات السخنة دي بنستخدمها في العادة في تانكات ليها ايرفلو واسع عشان يساعد في تبريدها عشان ماتحرقش القطن.. ومن خصائص لسانك الربانية انه "الى حد ما" بيتاثر سلبا بالحرارة العالية وممكن يقل احساسه بالفلافور.. ومن خصائص لسانك برضه انه مابيقدرش يتدوق كويس اذا كان جاف وعطشان ومش رطب ودي حاجات كلها بتتوفر مع تانك ليه ايرفلو واسع (عشان كدا بنقولك اشرب مايه كتير عشان تعوض الجفاف اللي بينتج من خامات الفيب واحيانا في موضوعنا هنا من حرارته).

يعني كخلاصة بالنسبة للفليفور في كونتاكت كويل بيسخن بسرعة خصوصا لو كان سب-اوم مع تانك بيديك كمية هوا كبيرة فانت موفر للسانك بيئة من الحرارة والجفاف ماتساعدش قوي على التذوق وعشان كدا احساس الفلافور هنا ممكن "نوعا ما" يكون ضعيف.. بس في حاجة بتسبح عكس التيار دا.. الحرارة العالية اللي بتضعف تذوقك هي نفسها المسؤول الاول عن تكسير واخراج الفلافور من الليكويد يعني من الناحية التانية هي بتساعد في اصدار فلافور اكتر في البخار لكن النقطة المفصلية هنا هل لسانك هيحس بيها في بيئة سخنة جافة من الهوا (ايرفلو واسع) ولا لا و دا يفرق من قدرة واحد للتاني على التذوق وممكن بالعكس تكون نقطة تفضيل عند البعض ويحبها كدا. بسبب قدرة الكويل دا على السخونة بسرعة في العادة هو مايقدرش يستحمل وات عالي قوي ممكن اخرك معاه 25-30 وات اذا مافيش اعصار هوا يبرده يا هيتحرق يا هيحرق القطن وزورك معاه في نوع من انواع الفعل الفاضح اللي هتكون انت وزورك ولوزك لو لسه عندك لوز ضحية مباشرة ليه.

من الناحية التانية عندك السبيسد كويل.. لفاته متباعدة يعني اللي بتسخن الاول مابتقدرش تساعد اختها قوي فكله بيسخن براحته وعشان كدا اداؤه الحراري اقل من الكونتاكت كويل.. بس ليه اداء مختلف ومميزاته.. بسبب ان اللفات بعيد عن بعض فهي بتغطي مساحة اتصال اكبر مع القطن وبالتالي بتتعامل مع مساحة فيها ليكويد اكتر وتديك فليفور احسن.. مش بس عشان المساحة لا.. بسبب وجوت فراغات بين اللفات فكل لفة بتسخن البخار اللي طالع من القطن اللي تحتها "بيلاقي مخرج" يوصلك منه ودا في النهاية اداء للطعم احسن على عكس الكونتاكت كويل اللي في الغالب (وكل ما تم اتقان تلاصق اللفات) البخار مابيلاقيش مكان يخرج منه بسهولة وبيتقتل معاه جزء من الفلافور. بسبب الاداء الحراري البطئ للسبييد كويل فهو عمليا بيقدر يستحمل وات اعلى وخصوصا لو فيه قطن سميك متشبع ليكويد ممكن يوصل بيك 50 عادي (ماتجربش الا لو انت فاهم بتعمل ايه.. لوزك ياحبيبي).. لكن في المقابل كمية الكلاود اضعف واقل كثافة بس الفلافور احسن خصوصا لو كان على حاجة فيها ايرفلو ضيق يساعد على التهوية "الدافئة" اللي هي بيئة حلوة لاصدار الفلافور. في ناس بتحب السبيسد كويل عشان بيدي نفس ابرد وفلافور احلى.. بس العنصر المنسي في المعادلة دايما هو التانك.. عشان كدا ممكن تلاقي فروق شخصية بين واحد والتاني من غير ماحد ياخد باله ان الطرف الغائب في المعادلة هو التانك وتصميم الايرفلو والتشيمني اللي بيلعبوا دور كبير واضافي في سخونة او برودة النفس والفلافور.

انت دلوقت فهمت اول عنصر بيتحكم في الكلاود والسخونة والفلافور.. الكويل وطريقة عمله.. مع المرات الجاية ان شاء الله هتعرف عناصر تانية زي الويك وتصميم التانك ونوع الليكويد ومع الوقت هتقدر ترسم خط واضح بتوليفة من كويل و ويك وتانك وليكويد يتفقوا في اداء واحد ويدولك الحرارة او البرودة اللي تحبها والكلاود او الفلافور اللي انت عايزه.